గురుగ్రామ్లోని రాజీవ్ చౌక్ వద్ద గురువారం ఉదయం ఒక మహిళ తన భర్తను, అతని మహిళా స్నేహితురాలిని నడిరోడ్డుపై అడ్డుకోవడంతో తీవ్ర గందరగోళం నెలకొంది.
ఈ హై-వోల్టేజ్ డ్రామాను చూసి జనం విస్తుపోయారు. తన జ్యోతిష్యుడైన భర్త కారు అద్దాలు పగులగొట్టడమే కాకుండా, అతని గర్ల్ఫ్రెండ్ను జుట్టు పట్టుకుని రోడ్డుపై ఈడ్చుకుంటూ వెళ్లి కొట్టింది.
ఢిల్లీ నుండి వెంటాడిన భార్య: నిందితుడైన భర్త ఢిల్లీలో జ్యోతిష్యుడిగా పనిచేస్తున్నాడు. గత కొంతకాలంగా భర్త ప్రవర్తనపై భార్యకు అనుమానం ఉంది. గురువారం ఉదయం అతను తన మహిళా స్నేహితురాలితో కలిసి బయలుదేరగా, భార్య ఢిల్లీ నుండే వారిని వెంబడించింది. ఉదయం 11 గంటల సమయంలో రాజీవ్ చౌక్ వద్దకు రాగానే, ఆమె తన కారును అడ్డుగా పెట్టి వారిని ఆపింది.
ఆగ్రహంతో కారుపై రాళ్లు రువ్వి, లోపల ఉన్న యువతిని బయటకు లాగి రోడ్డుపై పడేసి కొట్టింది. భర్త అడ్డుకోబోగా అతనిపై కూడా దాడి చేసింది. దీనివల్ల ఎక్స్ప్రెస్వేపై భారీగా ట్రాఫిక్ నిలిచిపోయింది.
మహారాష్ట్ర నుండి వచ్చిన స్నేహితురాలు: సదరు యువతి మహారాష్ట్రకు చెందిన ఐటీ ఉద్యోగిని అని, వీరిద్దరూ గత 7-8 నెలలుగా పరిచయంలో ఉన్నారని పోలీసులు తెలిపారు. బుధవారం నుండి భర్త ఇంటికి రాకపోవడంతో భార్యకు అనుమానం బలపడింది. ప్రస్తుతం ఇరువర్గాలు ఒకరిపై ఒకరు పోలీసులకు ఫిర్యాదు చేసుకున్నారు.